Matthew 10

Jisas Nga Kitip Kᵾni Wu 12 Ni Kᵾⱡ

1Jisas elim nga kitip kᵾni wu 12 ni kᵾⱡ, wi ropa rukᵾr tᵾpa, ronduⱡ ngumba kur kit moⱡum wamp mbᵾ nga kur kit mbᵾ, tᵾk mundᵾk, kui ou kel mbᵾ nga elpa elpa pem wamp mbᵾ, etᵾk ting ei nga ronduⱡ ngurum.

2Nombuⱡa rung wu 12 kᵾⱡ nga mbi kᵾⱡ ya ei mel, kuimbal murum wu ei, Saimon ei, mbi kont ti tek, Pita nitmin ni kᵾn, ᵾngᵾn akil Andru kᵾn, wu Sepeti kangᵾm Jeims kᵾn, Jon raⱡ kᵾn, Pilip kᵾn Bartolomiyu kᵾn, Tomas kᵾn, Matyu ku moni takis ti wu ni kᵾn, Jeims wu Alpiyas kangᵾm kᵾn, Tatiyas kᵾn, Saimon ei, wu el kum kat Rom rup wamp ei, ropa nga tᵾpa mana nduimin nᵾk etᵾng. Wu kᵾⱡ nga wu ei kᵾn, Juras Iskariyot, wote Jisas rᵾk murum wu ni kᵾn.

5Jisas ndi, elim nga kitip kᵾni wu 12 ni kᵾⱡ, tᵾpa kongun ila mundpa, ik kᵾⱡ mel man ngumba mel, “Got nga ik nᵾpᵾl, mbo wamp mormin kona mbila kep, Sameriya kona mbᵾ nga kona peng mbila kep, rukᵾr pi nᵾpᵾi! 6Enim puk Isrel wamp mbᵾ, rᵾp wu ti mon elinga, kng sipsip mel, tiki polk mormin mbila pᵾi! 7Puk kᵾn, Got nga ik puⱡ i etᵾk nᵾk mel, ‘Got nga wamp tᵾpa mumuk rui uⱡ ei nondpa omba nᵾi!’ 8Kui peng em wamp mbᵾ etᵾk tᵾk, wamp on mbᵾ, rok rot nduk, kint pombuⱡma rorum wamp mbᵾ etᵾk tᵾk, kur kit wamp kᵾn moⱡum mbᵾ, makrᵾk tᵾk mundᵾk etᵾi! Enim memp tᵾnmin ei, wei nᵾwᵾ tᵾnmin ei mel ku, wamp mbᵾ ya nᵾnt uⱡ mbᵾ mel, gem ku etᵾk pindᵾi! Uⱡ mbᵾ mel etpᵾn, wote mel na ti, punt rok ngeing nᵾk, pilik iti nᵾtᵾi! 9Ku moni mat tᵾk enim nga kᵾng ila pendᵾk, mek pi nᵾpᵾi mon! 10Wal kumbana na kel kat kep, rapᵾk mek pi mon. Wote, wal pᵾki na ei nga kep, kᵾmp rᵾk mel mek pi nᵾpᵾi mon ku! Omba, nombuⱡa mam pangina, kᵾmp ambuⱡmba ei nga tᵾmbᵾⱡ na ti kep mon ku. Nambuⱡ emel, pung kona mbila mel mbᵾ nga tᵾk kun inding.

11“Enim kona peng kel muna, manga rᵾⱡaip na tila puk eng ei kᵾn, wamp nam ti ngorum puⱡ orunga, kai etᵾm wamp ei nga, manga ila pek muⱡᵾi! Molk wote, kona tila ku pᵾi! 12Wote, manga tila murᵾk puk, manga puⱡ wamp ei kundᵾk, moⱡpa kundi uⱡ ei, enim kᵾn piyangga, ngᵾi! 13Manga puⱡ wamp mbᵾ ndi, enim numan ngᵾk, rawe etᵾk tᵾng ndam, enim nga memp ik ei, wamp kᵾⱡ kᵾn piyangga! Muna, enim numan ngui nganggᵾk, rawe etᵾk ti natᵾng ndam, enim nga memp ik ei, en enim kᵾn yant wangga, ngᵾi! 14Wote manga rᵾⱡaip ti ndi, muna kona peng kel ti nga wamp mat ndi, enim rawe etᵾk ti natᵾk, Got nga ik ei tᵾk pei mundᵾk tᵾk, nguna kandᵾk, piling ei nga numan ngui nganggᵾk, eng kona ei wak rok, enim nga kᵾmp kaimp ila kᵾng ngupᵾn moⱡum ei ila, ndanda nduk, tek kelik pᵾi! 15Enim ik kupa ei kundᵾp nᵾnt, muⱡ mᵾi raⱡ pora nangga! Got ndi, wamp kᵾmp tᵾm ui ei kᵾn, kona peng na, manga rᵾⱡaip na mat, Got nga ik ei tᵾk nguna kandᵾk, tᵾk pei mundᵾk piling ei, numan ngui nganggᵾk, enim wamp nimbᵾ, mindil mam ti nuing. Ei, unt kor nga ei, kona Sorum, Gomora raⱡ, ropa kaⱡnga mindil norung ei mel mon. Wote, ama mindil elpa ti mel ku nuing.

Jisas Ndi, Mbun Mam Mat Omba Nitim

16“Kum tᵾiya! Na ndi, enim owa rakra mormin kona ila, kng sipsip tᵾk mondᵾrmin ni mel, enim tᵾp mundunt. Ei kᵾn, kimbuⱡa mel tᵾk mendᵾk, kᵾi imil mel, koma tek ᵾndᵾi!

17“Wamp ndi, enim imp molk mek puk, wu ou mbᵾ ngangina, atinga manga kel mbila, kanda ndi rok iting ei nga tᵾk mendᵾk ᵾndᵾi! 18Omba, mbo wamp moⱡᵾng kona mbila na ndi, nᵾi nᵾnt ik mbᵾ nᵾk, itᵾi nᵾnt uⱡ mbᵾ mel eng ei kᵾn, enim tᵾk mek puk, Rom kona mbᵾ nga rup nokundurmᵾn wu mbᵾ kᵾn, kona mbᵾ nga wu peng mumuk mbᵾ kᵾn, moⱡᵾng mbila, enim kot inding. Mbo wamp moⱡᵾng mbila, i eng uⱡ ndi, na nga ik ei para mba. 19Enim kot inding pilik imp molk mek ong ei kᵾn, etᵾp nᵾmin mel nant nᵾk, kᵾⱡ keⱡ numan ou nduk pili nᵾpᵾlᵾi! Enim nga ik ropᵾl rok, ning ui ei om kᵾn, Got elim ndi, enim nga keta ila nimba ngui ngui endᵾmba. 20Ik ning ei, enim ndi, kanda ni nᵾning. Enim ik ning ei mel, enim nga Oⱡa Wuta nga Muⱡnga ei ndi, enim kᵾn moⱡpa, ni nᵾndᵾmba.

21“Wu ᵾngᵾn ti ndi, ti rᵾk muⱡangga rok kunding. Wu Tipam ti ndi, elim nga kangambuⱡa mbᵾ, rᵾk muⱡangga, rok kunding. Muna, kangambuⱡa ndi, en enim nga mam tipamᵾl mbᵾ, rᵾk muⱡangina, rok kunding. 22Wamp minal ei ndi, na nga nᵾndᵾk eng uⱡ ila kandᵾk, enim numan ngui ngᵾnging. Ei kᵾn, wamp nam ti ndi, na nga ik ei pewa aiwa nimba, ambuⱡpa gi ndupa muⱡangga, kot ending uⱡ ei, pora nim ndam Got ndi, wamp ei etpa tᵾmba. 23Enim kona peng ila pangina, tᵾk kot ending ndam, kona ei wak rok kelik, kona peng elpa tila ku pᵾi! Enim ik kupa ei kundᵾp nᵾnt, Got nga ik ei, Isrel kona peng tetᵾm mbᵾ nga kona peng mat ila kundᵾk, ni nᵾni muⱡangina, wote Muⱡᵾl Wu Kupa ei, yant omba.

24“Skul kangambuⱡa ti ndi, elim nga ik mbo wu ei, tᵾpa mana ndumba mel mon. Kindmant wamp ei ndi, elim nga wu nuim ei tᵾpa mana ndumba mel mon. 25Ei kᵾn skul kangambuⱡa ti ndi, ik mbo wu ei mel, kapⱡa muⱡimp nimba pilpa, mil kan etpa om ndam, kapⱡa etmba ku. Omba kindmant wu ti ndi, elim nga wu nuim ei nga kitip kandpa, kongun em ndam, kapⱡa ku etmba. Wote, wamp mbᵾ ndi, manga puⱡ wu ei kundᵾk, Biyelsipul kur kit mbᵾ nga nuim ei, nᵾng ndam, wote manga tenda ila petmin wamp mbᵾ i ku etᵾk, ik kit wei mat ku nᵾnding.

Nuim Got Ei Nga Mundmong Iti!

26“Ei kᵾn, enim wamp mbᵾ nga mundmong iti nᵾtᵾi! Uⱡ mo rok, ik mo rok nᵾk eng mbᵾ, etpa tᵾpa mot ndumba. 27Na enim rumbᵾⱡ ila, kundᵾp nᵾnt ik kᵾⱡ, wote rᵾnggilmᵾ nᵾk, mot ndᵾi! Wote, enim ol tep kundᵾp nᵾnt ik kᵾⱡ, tᵾk pena ila pendᵾk nᵾi! 28Enim nga kᵾng kᵾⱡ rok kunding. Wote, min ei rok kundi nᵾkᵾnding. Wote wamp mbᵾ nga, mundmong indi nᵾndᵾi! Kᵾng kep, min kep, pᵾkᵾ ropa, ndip kona ila mundᵾmba wu Got ei nga mint mundmong indᵾi! 29Kᵾi waⱡ raⱡ nga ku kuⱡi tenda na, ei mel rop mundpᵾn tilmina. Ei wote, enim nga muⱡ kona morum Wu Tipanᵾm kupa ei ndi, kandpa kilangga, kᵾi raⱡ nga ti tᵾpa, kawa ndupa mana omba, koⱡmba mel mon. 30Enim wamp mbᵾ, nga peng ila, peng ndi namba iti morum ei, Got ndi pilpa ketᵾm. 31Ei nga, mundmong iti nᵾtᵾi! Enim wamp mbᵾ kᵾi waⱡ na ei mel mon. Enim wamp ei, Got nga kuimp keta ila, mel numan ngui elpa ti mel ku mormᵾn.

Kraist Petmin Nᵾk, Nᵾk Mot Nduing, Muna Kraist Pili Napᵾtmin Ning

32“Wamp nam ti ndi, wamp moⱡᵾng kona pena mbila moⱡpa, na nga para ndupa, nimba mot ndum ndam, na ndi i ku etᵾp, na nga muⱡ kona Wuta morum ila, wamp ei nga nimp mot nduimp. 33Muna wamp nam ti ndi, wamp moⱡᵾng kona pena mbila moⱡpa, na nga ik ei pi napᵾtmᵾn nim ndam, na ndi, i ku etᵾp, na nga muⱡ kona Wuta moⱡum ila, wamp ei na pi napᵾt ku nimp.

Jisas Ndi, Wamp Etpa Oi Kan Pendᵾmba Urum

34“Enim ndi, na ya mᵾi kona ila, moⱡpa kundi uⱡ ei nga mep ur nᵾk, pili nᵾpilᵾi mon! Na ya moⱡpa kundi uⱡ ei, mep ui nᵾwᵾr. Na ndi, wamp mbᵾ etᵾp, oi kan pindimp pilip, koiya nengina ti mep ur. 35Puⱡ geka nangga nᵾmp ur ei mel, na ndi, wu tipam kangᵾm raⱡ, mam mbuⱡam raⱡ, amp apᵾm apᵾm raⱡ mbᵾ, oi piyangga nᵾmp ur. Wote, wu ti nga el puⱡa wamp mendpᵾⱡ muⱡing kᵾⱡ, elim nga manga tenda wamp kᵾⱡ. 37Wamp nam ti ndi, elim nga mam tipam raⱡ numan minal ngumba. Na wei wei etpa, numan ngum ndam, wamp ei na nga kitip kᵾni wamp moⱡmba mel kapⱡa mon! Wamp nam ti ndi, i ku etpa, elim nga kangambuⱡa mbᵾ, numan minal ngumba. Na wei wei etpa, numan ngum ndam, wamp ei na nga kitip kᵾni wamp moⱡmba mel, kaⱡpa mon. 38Wamp nam ti ndi, elim nga nde peta ei koma rui narᵾpa, na kᵾn pep ropa ui nawᵾm ndam, na nga kitip kᵾni wamp moⱡmba mel, kapⱡa mon. 39Wamp nam ti ndi, elim nga mᵾi kona ila moⱡpa mba, uⱡ ei nga kel rondum ndam, wamp ei kont mba mul uⱡ ei ti natᵾmba. Muna wamp nam ti ndi, na nga nᵾndpa uⱡ mat itangga! Wote, elim rok kondung ndam, kont mba mul uⱡ kupa ei tᵾmba.

Got Ndi, Punt Ropa Ngumba

40“Wamp nam ti, enim rawe etpa tᵾm wamp ei, na rawe etpa tᵾmba. Wote, wamp nam ti, na rawe etpa tᵾm wamp ei, wi muⱡ kona na tᵾpa mundrum wu ei, rawe etpa tᵾmba. 41Wamp nam ti ndi wamp ei, Got nga nombuⱡa rung wamp ei nimba, rawe etpa tᵾpa mepa, elim nga mang kona pum ndam, wamp ei Got nga nombuⱡa rung wamp ei nga punt mel, Got ndi, ngumba ei kunda tinggil. Wote, wamp nam ti ndi, wamp ei, uⱡ kai mbᵾ etᵾm nimba, rawe etpa tᵾm ndam, wamp ei uⱡ kai mbᵾ etᵾm wamp ei nga punt mel, Got ndi, ngumba kunda tinggil. 42Na ik kupa ei nᵾnt, wamp nam ti ndi, wamp kurpa ti kandpa wamp ei, Jisas nga kitip kᵾni wamp ti, kant ei ka nimba, mbo nu kot nui nimba, kuⱡpa ngum ndam, wamp ei, Got ndi, wak ropa wei mundi namᵾndᵾmba,” nitim.